रफाह। गाजामा इजरायली बन्धक परिवारले हमासलाई प्रचार अभियानको एक भागको रूपमा बन्धकलाई जानाजानी भोकै राखेको आरोप लगाएको छ। हमासले एव्याटर डेभिडको भिडियो जारी गरेको थियो । यसपछि शनिबार डेभिडको परिवारको बयान आएको हो । यस भिडियोमा निकै कमजोर देखिएका डेभिडलाई साँघुरो र कङ्क्रिटले बनेको सुरुङमा देखाइएको छ ।
हमासले २०२३ को अक्टोबर ७ मा २४ वर्षीय डेभिडलाई बन्धक बनाएको थियो । त्यसबेलादेखि उनी अझै हमासको हिरासतमै छन् । दक्षिणी इजरायलमा एक संगीत महोत्सवबाट डेभिडलाई बन्धक बनाइएको थियो । ‘हामी हाम्रो प्यारो छोरा र भाइ एव्याटर डेभिडलाई गाजामा हमासको सुरुङमा जानाजानी र निन्दनीय रूपमा भोकै मारिएको हेर्न बाध्य छौँ– एउटा जिउँदो कङ्काल, जसलाई जिउँदै गाडिएको छ,’ उनको परिवारले भनेको छ । डेभिडको परिवारले इजरायली सरकार र विश्व समुदायलाई एव्याटरलाई बचाउन सम्भव भएसम्म सबै कुरा गर्न आग्रह गरेको छ । ‘मैले धेरै दिनदेखि केही खाएको छैन, मैले पिउनका लागि पानी समेत निकै मुस्किलले पाइरहेको छु,’ हमासद्वारा जारी गरिएको भिडियोमा डेभिडले भनेको सुनिन्छ । एजेन्सी
