काठमाडौं । डिजिटल बैंकिङको प्रवर्द्धन र ग्राहक सुविधालाई थप सहज बनाउने उद्देश्यसहित, राष्ट्रिय वाणिज्य बैंक (आरबीबी) ले फोनपे सँगको सहकार्यमा क्रस-बैंक टेलर क्युआर निकासी सेवा सुरु गरेको छ।
नेपालको डिजिटल भुक्तानी प्रणालीमा एक नवीनतम पहलको रूपमा आएको यो सेवाले फोनपे नेटवर्कमा आबद्ध जुनसुकै बैंकका ग्राहकलाई आफ्नै मोबाइल बैंकिङ एप प्रयोग गरेर आरबीबीका कुनै पनि शाखाबाट नगद झिक्न सक्ने सुविधा दिएको छ। “QR स्क्यान, नगद प्राप्त — सजिलो, स्मार्ट, सहज” भन्ने नारासहित सार्वजनिक गरिएको यो सेवा चेक, एटीएम कार्ड वा कुनै पनि कागजी दस्तावेजको आवश्यकता नपरी छिटो, सुरक्षित र कागजविहीन नगद निकासी प्रक्रिया प्रदान गर्छ।
क्रस-बैंक टेलर क्युआर ट्रान्स्याक्सन के हो?
यो सुविधा नेपालमा पहिलो पटक ल्याइएको इंटरओपरेबल डिजिटल बैंकिङ सेवा हो, जसअन्तर्गत फोनपे नेटवर्कमा आबद्ध जुनसुकै बैंकका ग्राहकले आरबीबी शाखामा गएर टेलर काउन्टरमा राखिएको क्युआर कोड स्क्यान गरी नगद निकासी गर्न सक्छन्।
सेवा प्रयोग गर्ने तरिका:
१. नजिकको कुनै पनि आरबीबी शाखामा जानुहोस्।
२. तपाईंको बैंकको मोबाइल बैंकिङ एप खोल्नुहोस् (फोनपे नेटवर्कमा आबद्ध)
३. टेलर काउन्टरमा रहेको क्युआर कोड स्क्यान गर्नुहोस्।
४. झिक्न चाहेको रकम प्रविष्ट गर्नुहोस् (मोबाइल एपको सीमाभित्र)
५. ट्रान्स्याक्सन अनुमोदन गर्नुहोस्।
६. नगद तुरुन्तै टेलरबाट प्राप्त गर्नुहोस्।
यो सेवा विशेष गरी एटीएमको पहुँच नपुगेका स्थानहरूमा वा आफ्नै बैंकको शाखा पुग्न नसक्ने अवस्थाहरूमा झनै उपयोगी बन्ने विश्वास लिइएको छ।
डिजिटल बैंकिङ समावेशीकरण तर्फको फड्को
आरबीबीको यो नयाँ सेवा नेपालमा इंटरओपरेबल डिजिटल सेवा को एक ठूलो कदमको रूपमा हेरिएको छ। प्रविधिको माध्यमबाट बैंकहरूबीच सहकार्य गर्दै, आरबीबीले वित्तीय समावेशीकरण, कागजी र नगद कारोबारमा निर्भरता घटाउने, र सर्वसुलभ बैंकिङ सेवा विस्तार गर्ने उद्देश्य राखेको छ।
“हामी ग्राहकहरूलाई सरल र स्मार्ट बैंकिङ अनुभव दिन प्रतिबद्ध छौं,” आरबीबीका प्रवक्ताले बताए। “यो सेवा हाम्रो नवप्रवर्तन र समावेशी वित्तीय प्रणालीप्रति रहेको प्रतिबद्धताको प्रमाण हो।” यो सेवा विस्तारसँगै नेपाली बैंकिङ क्षेत्रमा यस्ता सहकार्यहरू थप बढ्ने आशा गरिएको छ, जसले ग्राहक सन्तुष्टि र बैंकिङ दक्षता दुवैमा टेवा पुर्याउनेछ।
