काठमाडौं । संवैधानिक राजसंस्था र सनातन हिन्दु अधिराज्यसहित बहुदलीय प्रजातन्त्र पुनर्स्थापनाका लागि भन्दै राजसंस्था समर्थकहरूले जेठ १५ देखि अनिश्चितकालीन आन्दोलन गरिरहेका छन्। तीन दिन उनीहरूले शान्तिपूर्ण आन्दोलन गरे। आन्दोलनको सुरूको दिन सत्तारूढ दल नेकपा (एमाले) ले कार्यक्रम जुधाएकाले सुरक्षा चुनौती थपिएको थियो।
त्यसदिन पनि शान्तिपूर्ण बनेको आन्दोलन आइतबार भने उत्तेजित देखियो। राप्रपा नेपालका अध्यक्ष कमल थापासहितका नेता कार्यकर्ताले निषेधित क्षेत्र तोड्न खोजेको आरोपमा पक्राउ परे।अध्यक्ष थापालाई भेट्न पुगेका राष्ट्रिय प्रजातन्त्र पार्टी (राप्रपा) का सांसद दीपक सिंहसहित आइतबार ८ जना पक्राउ परेका थिए।
त्यसको विरोधमा संवैधानिक राजसंस्था र सनातन हिन्दु अधिराज्यसहित बहुदलीय प्रजातन्त्र पुनर्स्थपनाका लागि संयुक्त जनआन्दोलन समितिका संयोजक नवराज सुवेदीले हठात् उपत्यका बन्दको घोषणा गरे। उपत्यका बन्दको आह्वान गर्दा सुवेदीले आन्दोलनको महत्त्वपूर्ण घटक राप्रपासँग पनि समन्वय गरेका थिएनन्। अध्यक्ष थापासहित ७ जना आइतबार बेलुकी नै रिहा भए।
थापा रिहा भएसँगै बन्दको राजनीतिक उपादेयता कमजोर बनिसकेको थियो। राप्रपाका अध्यक्ष राजेन्द्र लिङ्देनले पार्टी बन्द–हडतालजस्तो अलोकप्रिय कार्यक्रमको विपक्षमा रहेको भन्दै सुवेदीले आह्वान गरेको सोमबारको उपत्यका बन्दमा सहभागी नहुने बताए।
