काठमाडौं। नेपाली कांग्रेसका महामन्त्री गगनकुमार थापाले १५औँ महाधिवेशन अघि पार्टी निर्वाचनमा सहभागी नहुने स्पष्ट दाबी गर्नुभएको छ। उहाँले सोमबार धुम्बाराही ब्यांकेटमा काठमाडौं–४ का कार्यकर्तासँगको छलफलमा महाधिवेशनपछि मात्र पार्टीले २१ फागुनको प्रतिनिधि सभा निर्वाचनमा जाने बताउनुभयो।
थापाले संविधानलाई ट्रयाकमा फर्काउन २१ फागुनमा निर्वाचन अपरिहार्य भए पनि, पार्टीको आन्तरिक प्रक्रियाअनुसार महाधिवेशन सम्पन्न हुनैपर्ने कुरा जोड दिनुभयो। “अधिवेशन बिना नेपाली कांग्रेस पार्टी निर्वाचनमा जाँदैन, जानु हुँदैन, जान सक्दैन, क्लियर छ यसमा,” उहाँले स्पष्ट पार्दै भन्नुभयो।
हाल सार्वजनिक भएको वडा अधिवेशनको सन्दर्भमा केही दिनको तालमेल भए पनि महाधिवेशन रोकिँदैन भन्ने उहाँको विश्वास छ। थापाले २१ फागुनमा चुनाव नभए देश ठूलो अनिश्चिततामा प्रवेश गर्ने जिकिर समेत गर्नुभयो।
