काठमाडौं । गर्मी ह्वात्तै बढेपछि जल तथा मौसम विज्ञान विभाग मौसम पूर्वानुमान महाशाखाले तराईमा सतर्कता अपनाउन आग्रह गरेको छ ।
मौसम पूर्वानुमान महाशाखाले तराईमा लू को खतरा बढेको भन्दै सचेत गराएको हो । महाशाखाले गर्मी बढी हुँदा तातो हावा चल्ने र लू लाग्ने सम्भावना हुने भन्दै घरबाट बाहिर ननिस्कन आग्रह गरेको छ । यस्तोमा वृद्धवृद्धा, बालबालिका, गर्भवती तथा दीर्घ रोगीहरुलाई विशेष ख्याल गर्नुपर्ने महाशाखाको सुझाव छ ।
मौसम पूर्वानुमान महाशाखाका अनुसार तराई र आसपास जिल्लामा केही दिनयता अधिकतम तापक्रम ४० डिग्री सेल्सियस नाघेको छ । मौसम पूर्वानुमान महाशाखाले तराईमा ५ दिनसम्म तातो हावा अर्थात लू चल्ने खतरा देखिएको जनाएको छ ।
तराईमा ४० डिग्री नाघ्दा काठमाडौं उपत्यकामामा समेत गर्मी बढेको छ । शुक्रबार काठमाडौंको तापक्रम अधिकतम तापक्रम ३२ डिग्री सेल्सियस पुगेको छ। काठमाडौँमा बिहानैदेखि चर्को घाम लागेकाले अत्यधिक गर्मी महशुस गरिएको छ ।
गर्मी ह्वात्तै बढेपछि तराईमा विद्यालय समेत बन्द हुन थालेका छन् । चितवनको विद्यालय एक साताको लागि बन्द गरिएको छ । मधेश प्रदेशका केही विद्यालय यसअघि नै बन्द गरिएको छ ।
